Poruk

UNTUAK ka sakian kalinyo si Kuncan mandonga carito tontang ibu dokter nan masih mudo dan rancak. Batugas di Puskesmas nan baru ditingkekkan dari Pustu atau Puskesmas pambantu. Satahu Kuncan samaso masih bastatus Pustu di situ cuma batugas babarapo urang parawat dan bidan.

Nan paliang tacelak dari nan balimo tu adolah ibu bikel atau bidan kalurahan, si Leni. Satahun nan lalu Kuncan lah mangenal si Leni ko. badannyo sodang-sodang sajo. Kuliknyo sawo matang, hiduangnyo mancuang dan ado losuang di pipinyo bilo inyo golak. Mirip bintang filem India nan top di tahun onam puluhan, Viyayan Timala. Si Leni ko dulu sempat pulo akrab jo Kuncan. Lah sempat pulo poi baduo-duo. Lalu kamudian si Leni mailak katiko mangata hui si Kuncan lah batunangan jo kamanakan papanyo si Elsa Minarti atau Mince, pramugari udara. Lalu sudah itu Kuncan lah lupo jo cewek-cewek di puskesmas Pembantu tu tamasuak si Leni.

Sasudah Pustu dijadikan Puskesmas ponuah kini dipimpin dek surang ibu dokter/ Ibu dokter nan masih mudo dan rancak tu copek jadi buah bibia masyarakat dek tasobuk ramah dan elok baso. Lagi pulo banyak nan sasuai barubek jo inyo. Carito iko nan sampai katalin go Kuncan baulang-ulang babarapo kali. Carito tontang cewek rancak nan jadi buah bibia urang banyak tu mambuek Kuncan jadi penasaan ingin kenal dokek jo ibu dokter tu. Ingin rasonyo Kuncan datang ka Puskesmas tapi ado hal nan rasonyo kurang malomakkan.

Tapi bukanlah si Kuncan kalau hal itu dianggap jadi penghalang. Jo prinsip, dima tumbuah situ disiang, suatu sore Kuncan datang ka Puskesmas. Kabotulan inyo agak flu pulo saketek. Patimban gannyo barangkali kalau praktek sore si Leni lai indak ado di situ. Dan untuang, si Leni lai indak batugas sore nampaknyo.

Urang nan datang barubek sore tu banyak nyo. Kuncan mandaftarkan namo ka asisten dokter nan agak genit-genit tangguang. ''Namo uda Kuncan, kan?, katonyo sambia malopehkan senyum manih jo lirikan suduk mato. ''E e e baa dek tahu'', tanyo Kuncan icak-icak heran. Pado hal inyo maklum, umumnyo cewek-cewek nan sabaya inyo kenal jo Kuncan. ''Tontu se tahu. Uda kan mantan pacar Leni'', kato cewek asisten tu pulo. Tapurangah Kuncan jadinyo mandonga.

Kuncan masuak ka ruangan pareso katiko tibo gilirannyo. ''Silakan duduak, apo nan sakik?'', tanyo ibu dokter sambia manulih di buku catatannyo. Inyo indak mamandang ka Kuncan nan togak mamparatikan ibu dokter tu sodang manulih. Dan rasonyo Kuncan indak asiang jo wajah dokter gadih mudo ko. Kalau indak salah samaso kuliah ompek tahun nan lalu ibu dokter ko tapiliah jadi ''Bintang Universi tas''. Waktu itu Kuncan jadi ketua panitia pamilihan''. Kapalo ambo sakik poruk'', jawab Kuncan sasudah inyo duduak. Tontu sajo ibu dokter heran mandonga jawab nan sarupo itu. Inyo maangkek wajahnyo mamandang ka urang nan manjawab. Ibu dokter tu tangangak sabonta, sudah tu inyo bakato satangah basorak. ''hai, Kuncan.

"Pak Ketua Panitia. Apo kaba'', Kaduonyo basolam orek. Nampaknyo ibu dokter ko lai indak lupo jo wajah si Kuncan. Aktifis kampus ko tapiliah jadi 'Bintang Universitas,'' katiko Kuncan masih tingkek ompek dan ibu dokter nan banamo Lily ko lah tingkek tarakhir di Fakultas Kedokteran. Walaupun balain Fakultas tapi Kuncan jo Lily ko tangabuang dalam suatu organisasi sosial budaya di lingkungan Universitas. Kalau ditinjau dari segi umua, dokter Lily satahn lobiah tuo pado Kuncan.

Pendek carito nan sa sore itu Kuncan dan Lily bacarito panjang. Kabotulan Kuncan adolah pasien tarakhir. Sampai lah azan magrib kaduonyo masih asik banostalgia. ''Jadi Kuncan lah direktur kini?'' tanyo dokter Lily. Kuncan cuma maangguakkan kapalo. ''Syukurlah kalau baitu. Ambo lah mandonga Kuncan lah jadi pangu saho swasta. Punyo toko swalayan, punyo Apotik dan usaho konsul tan. Eh...kalau si Mince baa kobanyo. Bilo ka diresmikan ikatan awak tu?''. Katiko mananayokan soal si Mince tu, ado parubahan di wajah dokter Lily. Parubahan tu tabaco dek Kuncan.

Ompek tahun nan lalu, Kuncan, Mahasiswa Fakultas Ekonomi marupo kan aktifis di Universitas. Awak gagah barado dan pandai bagaua. Di karumuni dek cewek-cewek. Waktu itu, Lily salah seorang nan simpatik ka Kuncan. Jo prediket ''Ratu universitas'', Lily ikut ba kompentisi marobuk parhatian si aktifis kampus. Sempat akrab babarapo lamo dan simpatik barubah jadi cinto. Tapi Lily kamudian mundur teratur sasudah mangatahui Kuncan lah batunangan jo kama nakan bapaknyo. Bausaho malupokan si anak mudo tu. Walaulah bausaho, nampaknyo kuncup sayang nan mulai tumbuah tu masih babokeh. Walau lah ompek tahun kamudian, saat batomu baliak jo urang nan parnah hinggok di suduk hatinyo itu. Inyo indak bisa manahan parasaannyo. Itu nan mambayang ka wajahnyo cako.

Kondisi nan sarupo itu tabaco dek Kuncan. Timbua niat di hatinyo mamanfaatkanyo. ''Kami memang lah batunangan. Namun barangkali sulik ditingkekkan lobiah jauah. Banyak pabedaan nan tadapek antaro kami. Bahkan ado nan prinsip. Mungkin si Mince bukan type nan cocok jo ambo. Dan untuak Lily katahui, Mince indak sarupo jo Lily. Kalau Lily, walau umua awak babeda, tahu bona jo apo mau nyo ambo'', Kuncan mulai mamasang parangkok. ''Tapi kalau awak indak mungkin bisa batomu doh. Banyak panghalangnyo'', jawab Lily.

Kuncan sarupo indak mandonga apo nan dikatokan Lily. Inyo pindah ka sampiang si Lily nan duduak di sofa panjang. ''Untuak mandapek sasuatu harus ado pajuangan. Makin banyak kendalanyo makin manih hasilnyo'', dan Kuncan mulai barani mamogang tangan Lily. ''No way, Ncan. No, way!'', Lily masih bausaho mailak. Saat Kuncan bausaho maraok kapalo Lily untuak di sun sayang bel babunyi. Kuncan malopehkan polukan tangganyo dari Lily. ''Sia nan datang? Pasien?'', tanyo Kuncan nan ongoknyo mulai sosak manahan emosi. ''Bukan. Panghalang nan Lily mukosuk tadi'', katonyo sambia togak mambukakkan pintu. Katiko inyo baliak ka ruang tamu, di bala kangnyo mairiang surang laki-laki gagah. ''Kenalkan Ncan. Iko suami Lily'', kato si Lily. Ado nan tasondek di karongkongan Kuncan sahinggo inyo sulik untuak basuaro katiko basolam jo laki- laki gagah tu. Samantaro itu paruknyo taraso modu tasosak kontuk. Mungkin dek karono strategi ''Kapalo Sakik Poruk'' cako.

[ Up ]