Lonceng Pokaknyo Tabuai    

     Carito Cui Idra    

     INYIAK Tompel sabona bongih ka sikuncan. Masalahnyo dek karano Inyiak
     Tompel diisukan urang bamain mato jo Upiak  Gajeboh.  Isu nan
     bakombang dari muncuang ka muncuang tu kato  babarapo  urang nan
     dipicayo basumber dari si kuncan.    

     Oncu upiak Gajeboh olah hampia satahun manjanda karano suaminyo Malin
     Bosa maningga dek kecelakaan oto. Walaupun umuanyo olah lobiah ompek
     puluah tahun, tapi wajahnyo, masih kalihatan mudo dan badannyo gopuak
     subur.    

     Sodangkan Inyiak Tompel, guru silek si kuncan nan sahari-hari batugas
     sabagai satpam, pensiunan suatu instansi. Manuruik cari to, Inyiak
     Tompel samonjak di tinggakan bininyo duo puluah tahun nan lopeh indak
     bagonti-gonti sampai kini. Inyo bacarai mati jo bininyo.    

     "Bialah den marando togang. Masih taraso sakiknyo sampai kini
     ditinggakan urang nan dicinto". Baitu kato Inyiak Tompel suatu kali
     katiko inyo bacarito jo kuncan.    

     "Tapi Nyiak. Kalau buliah ambo manyarankan eloklah ado nan man
     dampingi Inyiak dihari tuo. Sia tahu kalau tajadi apo-apo. Buruak
     disobuik andai Inyiak sakik, lai ado nan kamarawat di rumah. Kalau
     Inyiak sasuai, oncu Upiak Gajeboh sapadan kalau bajodoh jo Inyiak.
     Inyo manjando, Inyiak manduda. Pas ambo kiro", jawab si kuncan.    

     "Saboleh jo kapalo, nan aden usah ang jodoh-jodohkan. Untuak hiduik di
     hari tuo indak paralu campua tangan urang lain. Apo lai nan namonyo
     padusi. Kalau nyampang aden sakik atau domam, ado rumah sakik, ado
     puskesmas tompek barubek. Kalau aden mati, utang urang nan tingga nan
     mangubuakan aden.    

     Tamasuak kawajiban waang", jawab Inyiak Tompel mulai bongih. Itu
     tajadi kiro-kiro sabulan nan lopeh. Tapi sajak itu Kuncan indak namuah
     batamu jo guru sileknyo tu.    

     Bongih baliau tu batambah-tambah dek ado isu baliau tu main mato jo
     Upiak Gajeboh. Olah dapek dipastikan isu tu basumber partamo dari si
     Kuncan. Upiak Gajeboh nan balapau kopi sabalun iko oleh gadele pulo
     dek Kuncan. Usul nan samo pernah pulo diajukan ka Upiak Gajeboh. Tapi
     caronyo balain.    

     Ka Upiak Gajeboh bakatokan bahaso Inyiak Tompel manaruah hati ka inyo.
     Dan oncu Upiak Gajeboh agak picayo karono Inyiak Tompel paliang kurang
     duo kali sahari minum kopi di lapaunyo. Satiok minum kopi kaduonyo
     kadok talibat jo gorah kucekak. Gorah tu salalu datang partamo dari
     Inyiak Tompel. Umpamonyo komentar Inyiak Tompel kalau pagi-pagi.    

     "Basah obuak moh piak . Pulang apak paja malam". Atau :"Toba bodak moh
     piak. Tabaun sampai kasiko", dan lain-lain. Dan biason yo mandonga
     komentar-komentar sarupo itu oncu Upiak Gajeboh golak malu-malu sambia
     mamandang jo suduk mato ka Inyiak Tompel.    

     Kurenah Inyiak Tompel sarupo itu bacaritokan dek Upiak Gajeboh ka
     urang lain. Urang-urang nan mandapek carito, manyampaikan pulo pado
     nan lain sahinggo tajadilah isu-isu nan bakombang cako.    

     Kainginan si Kuncan untuak mampatomukan jodoh kaduonyo. Suatu kali
     inyo manciluk sarowa kandik Inyiak Tompel. Sarowa kandik tu diborikan
     ka oncu Upiak Gajeboh. Dan bakatokan bahaso Inyiak Tompel mintak
     tolong mancucikan sarowa kandik tu.    

     Oncu Upiak Gajeboh jo sagalo sonang hati mancucikan sarowa kandik
     Inyiak Tompel. Sasudah dicucikan lalu dijamua dirusuk rumah. Kuncan
     maambiak foto Upiak Gajeboh sodang maampaikan kain tu.    

     Foto tu dicetaknyo banyak-banyak untuak diedarkan ka nan lain. Inyiak
     Tompel  sabona tarabo dek parangai  muriknyo  tu.  Kuncan dicarinya
     sampai dapek. Sajak mandonga dicari-cari Inyiak  Tompel Kuncan
     sangajo indak datang-datang ka pondok  baliau.    

     Sapandai-pandai manyuruak, akhianyo Kuncan dapek jo dek gurunyo tu. Di
     suatu sore katiko Kuncan pulang. Dan batomu dilapangan parkir.    

     Inyiak Tompel manunggu dokek oto tu. Indak sampai satangan jam mananti
     lah nampak si Kuncan bairiang-irisng jo Ayunda Andestu. Asik maota
     sambia bajalan ka arah tompek parkir. Sabolun naik oto, Inyiak Tompel
     mamocik tangan Kuncan. Tanpa mampadulikan si Ayunda Andestu nan
     tacongang heran, so Kuncan diiriknyo ka Batang Agam.    

     Agar indak manariak parhatian urang banyak, Kuncan manuruik sajo.
     Kaduonyo saroman urang babimbiang tangan sampai ka tompek tingga
     Inyiak Tompel di topi Batang Agam.    

     Sasampai halaman pondok Inyiak Tompel bakato jo suaro kareh dek bongih
     : "Sampai hati waang mamfitnah aden. Kan olah aden katokan ka waang.
     Aden indak ka kawin-kawin lai doh. Cukuiklah sakali den manderita dek
     padusi. Apo gunonyo waang jodoh-jodohkan aden jo Upiak Gajeboh".    

     Kuncan indak ilang aka. Inyo manjawab :"Niat ambo elok. Cubolah Inyiak
     pikiakan baliak". Mandonga jawab muriknyo tu Inyiak Tompel samakin
     tarabo. Inyo malompang si Kuncan. Tapi Kuncan nan olah banyak baraja
     silek ka baliau, copek mailak. Mangepohkan lombang nan datang. Dek
     tangannyo luput, Inyiak Tompel malopehkan cuek sitaralak. Sakali lai
     dapek juo diilakkan si Kuncan.    

     Mako tajadilah cokak antaro guru jo murik. Dek karano salamo jadi
     murik, Kuncah lah banyak manarimo alemu gurunyo tu, mako cokak
     kaduonyo sabana seru. Nan ciek lincia nan sorang galia. Cuek bagonti
     cuek. Dongkak batimbang dongkak. Tapi indak ado nan konai doh.
     Kaduonyo samo-samo pandeka. Sampai satangah jam, Olun nampak sia nan
     kabaralah.    

     Akianyo Inyiak Tompel mangaluakan jurus simpanan nan olah lamo indak
     dipakainyo. Dan jurus ko alun pernah diajakan ka si Kun can. Banamo
     jurus "Tupai manggiriak". Kuncan indak bakutiak ditangan gurunyo tu.
     "Ampun Nyiak, ambo manyorah ", kato si    

     Kuncan jo sosak angok. Inyiak Tompel mangonduakan kunci kotuakn yo.
     Dasar si Kuncan galia, marasokan badannyo lungga, inyo mangaliek jo
     jurus "bolok kalua liang". Badannyo lopeh salosai, kaki kuncan
     manggarik jo jurus "sepuh sapu arai".    

     Kaki Inyiak Tompel nan tagaiang konai sapu. Inyo kahilangan
     kasimbangan jatuah tatilontang. Olun samparono ilang takojuk Inyiak
     Tompel, Kuncan sacopek kilek maronggukkan sarowa kandik hitam dan
     dipakainyo. Kandik lapang guru silek tu pindah ka tangan Kuncan.    

     Inyiak Tompel biasonyo kalau mamakai kandik indak balampisi jo sarowo
     kolor di dalam, indak babenen. Jadinyokini baliau batilan jang gegek.    

     Sasudah tapocik sarowa kandik gurunyo itu, Kuncan togak dan lari
     maninggakan halaman pondok. Dek talampau bongih Inyiak Tompel
     mangojanyo dari balakang. Kuncan lari ka pasa Ibuah samantaro gurunyo
     totap juo mangikuti. Dek talampau bongih Inyiak Tompel indak sadar jo
     kadaaan dirinyo dalam situasi ''open'' dibagian bawah.    

     Lucu bontuaknyo ''lonceng pokal'' pusako tu dibawo lari. Si Kuncan
     lari samakin koncang sambia basorak; ''Urang gilo batilan jang
     mangamuak''. '"Tolong'' toloooooooooonnng.    

     Mandonga sorak si Kuncan barulah Inyiak Tompel sadar jo kaadaan diri.
     Inyiak Tompel malu jadi tontonan urang nan lalu lalang. Inyo malompek
     ka dalam sawah manyuruakkan nan pantang tacoliak. ''Tolong ambiak kain
     saruang den di pondok'' soraknyo ontah kasiapo ditujukan.
        

[ Up ]