Make your own free website on Tripod.com

" Selamat Datang di UKM - ITB Website .......... Salam sarato Sambah dari kami, Keluarga Besar UKM- ITB "

 

Carano On-Line

foot.gif (8017 bytes)

     CARITO CARO AWAK    
     Anunyo Sabona Godang    
     Carito Cui Idra    
     LAHIE dari kaluarga nan godang. Mukosuknyo inyo adolah anak nan tatuo
     dari ompek boleh basaudaro. Walaupun indak sempat jadi urang godang di
     kampuangnyo, bapaknyo di panggie guru godang. Bapaknyo dulu adolah
     pansiunan kapalo sakolah rakyat. Lah maaja samanjak zaman Balando.    
     Dek anak nan tatuo, mako dek mandeh bapak, inyo katiko bujang ketek
     saisuak kodok dipanggia si Buyung Godang. Walaupun namo panggilan tu
     hanyo dalam kaluarga, tapi lokek sampai kini. Buyuang Godang kini lah
     ba umua lobiah ompek puluah. Lah buliah pulo dikecekkan jadi urang
     godang, buek ukuran kota awak, Payo kumbuah. Gola insinyur peternakan,
     dimanfaatkan untuak bawira swasta, mambukak lahan taronak diateh tanah
     urang gaeknyo nan talatak di kaki Bukik Godang.    
     Sabolun awak toruhkan carito ko indak salah kalau kito katahui namonyo
     sasuai jo akta kelahiran yaitu Akbar Ramdani. Longkoknyo tontu Ir.
     Akbar Ramdani. Namun panggilan kesayangan Buyuang Godang totap balaku
     di kalangan kaluarga. Ompek tahun nan lalu gola pusako Dt. Rajo Nan
     Godang dipacayokan pulo dek kaumnyo ka baliau ko.    
     Usaho wiraswasta peternakan nan dibukak dan dikalola sacaro moderen,
     sasuai jo alemu nan didapek, sangat mambantu pamerentah daerah. Dalam
     bidang tanago karojo sajo bisa menyerap kiro kiro tigo ratuh urang
     tanago. Mulai dari tanago sarjana sampai tingkek buruh kasa. Nan di
     utamokan tontu sajo warga setempat. Jenis taronak mulai dari kambiang,
     ayam, jawi, kudo, biri biri. Indak katinggalan ikan, udang, boluk dan
     lain lain. Dalam pangalolaan dan manajemen, Pak Akbar Ramdani sangajo
     mautus pagawainyo untuak baraja ka Jawa Barat. Kecek urang di situ nan
     paliang godang lahan peternakan di Asia Tenggara. Caro manajemen
     sarupo di situ, diterapkan pulo dek baliau di peternakan nan dibori
     namo peterna kan Bukik Godang.    
     Dalam mamparingati ulang tahun Gonjong Limo Plaza nan katigo, diadokan
     suatu acara yaitu pamilihan warga Kota Taladan. Panitia acara ko
     bakarojo sacaro rahasia sakali. Anggota panilai hanyo limo urang dan
     umumnyo tadiri dari anak mudo kreatif. Nan salamo ko dianggap lah
     banyak pengalaman di bidang lomba lomba. Figur nan ka dinilai nanti
     adolah urang nan punyo orientasi usaho nan orek jo maso depan ekonomi
     di daerah ko. Baitulah kiro kiro. Tim panilai nan tadiri dari Kuncan,
     Upiak Talen, Uda Shanty, Boy Salim (wartawan) dan Onny Mongung, mulai
     mainfentarisasi barapo urang calon nan mamonuhi kriteria untuak figur
     warga kota taladan. Salah surang adolah Pak Ir. Ramdani. Nan lain
     tacatat masuak nominasi atau nan di unggulkan adolah Malin Garembeh,
     tokoh nan bahasia jadi pangusaha dalam bidang property (perumahan)
     sacaro ketek ketek. Kaistimewaan Malin Garembeh adolah indak pernah
     malalui pendidikan tinggi tapi hanyo jo ijazah SMP. Tapi barokat dek
     tokun kini lah jadi pangusaho Real Estat. Sabolun iko inyo pernah jadi
     parewa nan makan masak mantah.    
     Tokoh nan lain nan masuak nominasi iolah Oncu Zuraini Koto, Mandeh si
     Nareta Azuko. Mambuka usaho bidang industri wisata mulai dari home
     stay, motel, qest house, restoran. Nan indak kalah dan manonjol adolah
     usaho pabrik karupuak joriang nan bisa manembus pasaran luar negeri.
     Sahinggo oncu Zuraini Koto satu satunyo exsportir karupuak joriang nan
     bisa marobuk pasar di Eropah, Amerika, Jepang. Hanyo sajo untuak
     nagori Arab dan Ku wait, baru baru ko jatah kuata untuak negara negara
     tu di batasi dan nyaris konai embargo, karono sebagian godang badan
     pangalola WC di situ mangajukan protes ka pamerintah dek baun joriang,
     mulai mandatangkan polusi. Lagi pulo di Arab aia agak kurang. WC pado
     umumnyo pakai karoteh cebok. Nampaknyo baun joriang indak hilang kalau
     cebok jo karoteh. Ontah iyo ontah indak.    
     Tokoh nan duo lai nan masuak nominasi sabagai warga kota taladan
     adolah Ibu Camat Payokumbuah Selatan, nan bahasia manggalakkan boluk
     sabagai usaho pokok masyarakat di pedesaan. Kini kolah bisa mangirim
     boluk ka Jopang, India dan Kutub Selatan. Konon manuruk carito Ibu
     awak ko, kagemaran urang Jopang makan boluk lobiah hebat dari awak. Di
     Jopang banyak makanan nan bahan bakunyo adolah boluk. Ado karupuak
     boluk, bubua boluk, bistik boluk, hamburger boluk, sate boluk, sanoki
     boluk. Sanoki adolah samacam kolak dek awak. Mungkin kato kato sanoki
     barasa dari sanok. Jadi bararti nan tarakhir adolah kolak boluk. Lai
     ka baa rasonyo tu. Tokoh nan tarakhir adolah surang anak mudo nan drop
     out panggur uan tinggi. Nan barhasil manciptakan sabuah masin nan bisa
     manja hit atok daun rumbio sacaro otomatis. Daun rumbio bajahik. Namo
     paja ko adalah Zakaria Sulin.    
     Nan limo urang ko nan nan dinilai dek tim cako. Walaupun kalimo nyo
     dianggap mamanuhi syarat dan kriteria dewan juri, tapi harus ado
     juara. Walau limo urang tu bisa dikatokan sebagai wagra kota taladan,
     tapi nan paliang taladan tantu pulo harus ado Dek bobot kalimonyo samo
     mako panitia tapaso karajo kareh. Maungkapkan sisi nan salamo ko
     tasuruak dari tokoh-tokoh ko.    
     Sasudah malalui panalitian, partimbangan dan polemik antara juri, mako
     ditotapkan lah baaso nan paliang ikik dari limo nan paliang taladan tu
     adolah Pak Ir. Akbar Ramdani. Kalau dikaji sajarah baliau mako
     sapanjang parjalanan hidup salamo ko, Pak Akbar Ramdani dokek sakali
     jo kato kato ''Godang''.    
     Dalam kaluarga, katiko ketek dipanggia Buyuang Godang. Asa usul
     kaluarganyo dari Ompang Godang. Bako apaknyo di Pandam Godang. Apaknyo
     baru maaja saisuak di Biaro Godang. Sabolunyo pernah mangaji di Batu
     Hampa Godang. Buyuang Godang mulo mulo mangaji di Musajik Godang.
     Rumah asanyo rumah Godang di Tanjuang Godang. Masuak SR di Kubu
     Godang. Katiko jadi mahasiswa di ITB, pernah dioperasi karono dapek
     hernia nan mangakibatkan ''Kombuk pusa ko''nyo ''Godang''. Lah tamat
     sarjana pernah praktek jo urang Baringin Godang. Bininyo anak Ongku
     Godang di Koto Nan Godang. Kini mambukak usaho pataronakan di tanah
     pusakonyo nan loweh dan godang. Dibori namo Paternakan Bukik Godang.
     Punyo taronak banyak dan godang godang. Ompek tahun lalu dinobatkan
     jadi Pangulu jo Gola Dt. Rajo Nan Godang.    
     Itulah partimbangan tarakhir dari Panitia Pamilihan warga Kota
     Taladan. Bapak Ir. Akbar Ramdani. Akbar artinyo buliah juo ''Godang''.
     Ado pulo nan babisiak bisiak bahaso nan limo urang tu katiko dinilai
     kobanyo maagiah juri ''Amplop''. Namun nan paliang toba dan ''godang''
     dari Pak Akbar (Godang) Ramdani. Jadi inyo nan tapiliah jadi warga
     Kota Taladan. Apak sagalo Godang. Apak nan punyo sagalo Godang.
     Mungkin tamasuak salero, ota, karengkang dan pikakeh godang pulo?
     Ontahlah.   

FOOT.GIF (8017 bytes)

Up ] 

BOUNCH~1.GIF (8651 bytes)